‘होस्टेल ३’ को नयाँ प्रदर्शन मिति तय

फिल्म ‘होस्टेल’को तेस्रो श्रृंखलाको नयाँ प्रदर्शन मिति घोषणा भएको छ । निर्माताले शुक्रबार पोस्टर सार्वजनिक गर्दै २३ फागुनमा फिल्म रिलिज हुने जनाएका हुन् ।

उक्त मितिमा नेपालसहित विदेशमा समेत फिल्म रिलिज हुने निर्देशक सशान कँडेल ‘सन्तोष’ले जानकारी दिए । पोस्टरमा प्रमुख चार पात्रलाई चित्रण गरिएको छ, जसमा आशिष घिमिरे, पारस बम ‘कुल ब्वाय’, रिहान गिरी र पदम तामाङ छन् ।

आशिष चर्चित अभिनेता केदार घिमिरे ‘माग्ने बूढा’का छोरा हुन् । उनी यो फिल्मबाट डेब्यु गर्दैछन् । पारस बम सामाजिक सञ्जालका चर्चित कन्टेन्ट क्रिएटर हुन् । रिहान गायक तथा ‘भ्वाइस अफ नेपाल’को सिजन ५ का फाइनलिस्ट हुन् ।

फिल्ममा सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, आशिष पुरुष लगायत कलाकारले पनि अभिनय गरेका छन् 

फिल्मको कथावस्तु होस्टेलमा बसोबास गर्ने केही पात्रको नोकझोंक, संवेदना र रोमान्सका क्षणमा आधारित छ । माधव शर्माको पटकथा रहेको ‘होस्टेल’को तेस्रो श्रृंखलालाई सम्मान इन्टरटेनमेन्टले आरोन कन फिल्म्ससँगको सहकार्यमा निर्माण गरेको हो ।

कर्ण कार्की र गोविन्द अधिकारी निर्माता, सुरेश कँडेल सहनिर्माता र शङ्कर कोइराला कार्यकारी निर्माता हुन् । यसअघि फिल्मका दुवै सिक्वेल हिट भएका थिए ।